یازان: عسگر علیائی کلیان (یاشیل - خلخال)
کاغیذکونان بولگه‌سی 1358_ جی گونش ایلینه‌دک خلخال شهرینین بئشینجی حوزه‌سی ساییلیردی. بو بؤلگه 1358_جی ایلین قیش فصلینده خلخال شهریندن آیریلیب میانا شهرینه باغلی اولدو. تاریخ بویو خلخال ایله کاغیذکونان بؤلگه‌لری اورتاق بیر مدنیت‌له آذربایجانیمیزین مدنیت و فولکلورونون قورونوب ساخلانیلماسیندا دانیلماز پایی اولموشدور. ایندی کاغیذکونان بؤلگه‌سینین کندلرینده اؤزللیکله کلگان(کلیان) کندینده و خلخال شهرینین باشقا کندلرینده دام باسدیرما مراسیمی طنطنه‌لی بیر مراسیم اولاراق خالقیمیزین بیرلیگینی ساخلاییب کولتورونو منیمسه‌میشدیر.
کئچمیش زامانلاردا و هابئله ایندی ده بو بؤلگه‌لرده بو مراسیم ان بؤیوک بیر مراسیم ساییلیر. کند ائولرینین اوستونو اؤرتوب باسدیرماق اوچون نئچه گون اؤنجه‌دن ائو یییه‌سی کندین بیر نئچه قودرتلی اورتا یاشلی و گنج کیشی‌لرینی چاغیریر و هابئله قوواق (قلمه، تبریزی) یا سویود آغاجلاریندان اولان تیرلری و آتمالاری دامین اوستونه داشیییب، اونلاری یئرلشدیررلر. اونون اوستونو بعضا ایسه تاختا و چوخلو آغاجلارین یاش قول بوداغیندان اله گلن چیرپی ایله اؤرترلر.
منبع:ائل بیلیمی -ویژه استان اردبیل
ائو یییه‌سی دام باسدیرما مراسیم‌یندن بیر گون اؤنجه تورپاق ایله بوغدا سامانینی سو ایله قاتیر و بئله‌لیکله پالچیق دوزلدرلر. آنجاق بیر گون قاباق دان ائو ییهسی واسیطه‌سی ایله نئچه نفر ایشله‌یه بیلن آدام بو مراسیمه دعوت اولونار. صوبح ائرته ایکن چاغیریلان آدملار گلیب و بیر نئچه‌سی پالچیغی قاریشدیریب کونده دوزلدرلر. بیر نئچه‌سی ده آرخالارینا سبد تاخاراق کونده‌لری دام اوستونه داشییارلار. بیر نئچه نفر ده کونده‌لری دامین بوش یئرلرینده یئرلشدیریب دامین اوستونده کی آچیق یئرلری توتارلار. آنجاق بیر نفر ده مالا الینه آلیب دامین اوستونو هامارلایار.
بو مراسیم صلوات ایله توکنر. البته بو مراسیم ده ایشله‌ین آدملار امک‌سیز (پولسوز، اجرت‌سیز) بو ایشه گیریشرلر. آنجاق یالنیز ائوییه‌سی بو مراسیمده ایشله‌ینلره قایلان آلتی (صبحانه) و ناهار و بعضا ایسه شام وئرر. ائو ییهسی پیشیریلن شیلان (خرج دادن- مهمانی دادن) دان آغ ساققال و آغ بیرچکلره و همده فامیل و قونشولارا پای آپارار.
ایضاح:
* کاغیذکونان(کاغذکنان) بؤلگه‌سی آقکند شهرینین مرکزیتی ایله 15/10/1358_ جی گونش ایلینده 124 پارچا کند ایله خلخال شهرستانین دان آیریلیب میانا شهرستانینا باغلی اولدو. ایندی کاغیذکونان بؤلگه‌سی 73 پارچا کند ایله تانینیر.
* کلگان کندی دؤولت سندلرینده کلیان یازیلیر. بو کند کئچمیش زامانلار 60 ائودن عبارت اولموشدور. ایندی بو کند40 ائولی‌دیر.
* دام باسدیرما: تیکیلن ائویین اوستونو اؤرتمک.
* چیرپی: آغاجلارین شووکه‌لی قول بوداغی.
* آتما: ائوین اوستونه و هابئله تیرلرین آلتینا سالینانار.