سولماز پورنعمت پیله رود
فولکولورون کؤکو آذربایجان اراضی‌سینده بیر اولدوغونو نظره آلاراق، هر منطقه و ماحالدا، اؤزونه مخصوص فولکولورا مالیک اولدوقدا ائله بو کؤکدن قیدالانمیشدیر. آیدیندیرکی هر ائل ایله قوم اؤز کیملیگینی، فولکلورو ایله تانیتدیرا بیلر و اونو قورویوب ساخلاماغی اؤز هویتینی قوروماق دئمکدیر. بو آچیق مسئله‌نی نظره آلاراق، ائل بیلیمی درنه‌یی (آذربایجاندا ایلک فولکلور مؤسسه‌سی) قورولوب ایشه باشلایان گوندن بورا کیمی بیر چوخ شهر و حتی کندلرده ساکینلشمیش خالقین فولکلورونو «بولتن» شکلینده چاپ ائدیب، سایین اوخوجولارینا چاتدیریب.
بو ایل پاییزین ایلک آییندا بو موسسه طرفیندن نمین ماحالینین فولکلورونا دایر ۵۶صحیفه‌لیک بیر اؤزل سای بوراخیلدی. نمین یازیچیلاری و قورومدا چالیشانلارین چاباسی ایله چاپ اولان بولتن اوخوجولار طرفیندن آرتیق قارشیلاندیغی اوچون، بو قرارا گلدیک آیری بیر سای البته گئنیش بیر جغرافیا دایره‌سینی احتوا ائدن، یعنی اردبیل استانی اوچون، حاضیرلانیب یاییلسین.
ائله بو اساسدا استان‌دا یاشایان قلم صاحیبلری طرفیندن، دیرلی فیکیرلر و ملاحیظه‌لردن علاوه اردبیل، نمین، مشکین، خالخال، پارس‌آباد و... شهرلرینه باغلی اولان شیفاهی خالق ادبیاتیمیزدان آلینان قیسا و عینی حالدا دولغون یازیلار الیمیزه چاتیب. اونلار بو ساییدا سیز حؤرمتلی اوخوجولاریمیزا تقدیم اولونور.
دیرلی، یول گؤستریجی باخیش، سوال و یازیلاریزین یولونو گؤزله‌ییریک. ساغ اولون.