یازان: محمدعلی اوجاقی
سون گونلرده منطقه میزین آدلیم یازیچیسی اولان خانیم سولماز پور نعمت طرفدن تأسوفلو و آجی بیر خبر الیمه چاتدی "تأسوفله اصلان زاهدی دونیاسین ده ییشدی" بو خبر منی اوره کدن کدرلندیردی.
صنعتکار قایناغی اولان نمین بولگه سینین پیله چای ماحالیندا 1312 جی ایلده دونیایا گلن اصلان زاهدینین چاپ اولموش اثرلری او جمله جالادیم گونو گونه، من سنی آتمارام اوره ییمده سن، قوربت ائلده و گیزلمه عشق اودونو خانیم پورنعمت واسیطه سیله الیمه یئتمیشدیر.
بوگؤزل کیتابلاری اوخودوقدا اولدوقجا تاثیرلندیم.شاعیرین قارشیسیندا دیز چوکمک گرک دئیه بو قرارا گلدیم کی اوستادیمیزی یاخیندان گوروب زیارت ائدیم بو گون صاباح دئیه مع الاسف بو سعادت منه نصیب اولمادی و آرزیم اوره ییمده قالدی.عومرونون سونونا دک شهرت پرستلیکدن اوزاق اولان اصلان زاهدینین چوخ گوزل احساسلی و جانا سینر میصراعلاری واردیر اوطبعینی بیر چوخ شعر اولچوسیله سیناسا دا آنجاق قوشمالاری آیری بیر عالمدیر منجه شاعیریمیزه قوشما اوستادی دئسه ک یانیلمامیشیق. اونون یارادیجیلیغینین ان اوزل خصوسیتلریندن بیری دوغما دیله اوستونلوک وئرمه سی ایدی و بوتون میصراع لاری آنلاشیقلی بیر دیلده یارانیب یازیلماسی اونون اثرلرینی داها گوزل لشدیریب و جانا سینرلشدیرمیشدیر و ائله بونا گوره دیر کی زاهدی نین شعرلری اوخوجولار طرفیندن گوزل وجهیله قارشیلانیب و محفیللر و مجلیسلرده اوخونوب و دیللر ازبری اولموشدور.
آذربایجانین ان قدرتلی قلم و سوز اوستادی اولان پوروفسور مختار علی اوغلو قیاسی قیمتلی واقتینی قویوب شاعیر زاهدینین من سنی آتمارام اوره ییمده سن شعر دفترینه مفصل و گئنیش اون سوز یازماسی شاعیریمیزین شعرلرینین داها گوج و ده یرینی بللندیرمده دیر.
اصلان زاهدینین میصراع لاری کئچدییی انیشلی، یوخوشلو حیاتیندان علاوه فیکیر و دوشونجه سینی ده گوزل وجهیله بیزه ایشیقلاندیریر و دئمک شاعیر حیاتین رئال میصراع لاریندا گورمک اولور.
اودور کی زاهدی بو گون دونیادان کوچسه اثرلریله بیرگه آدی دا دیللرده و کونوللرده قالاجاقدیر چونکی صنعتکارا اولوم یوخ و هر بیر صنعتکار و نغمه کار اوز یارادیجیلیغیلا ابدیلشیر.
موت جسمانیله گل سانما منیم اولمه ییمی سیدا اولمرم عالمدا سسیم وار منیم
اولو تانریدان شاعیریمیز اصلان زاهدی یه رحمت دیله ییریک.
روحو شاد و یولو داواملی اولسون