منبع: صبح سبلان-محبت فروغی :یازین ایلک گونلرینده توت آغاجینین آلتیندا چیلینگ آغاج اوینیان زامان ، اوزاخلاردان گَلَن بیر نیسگیللی سس اوشاقلاری اویونلاریندان ساخلیردی:
آغلارام آغــــلار کیمین
دردیم وار داغلار کیمین
خزان اولدوق توکولدوک
وِرانا باغــــــلار کیمین
آی اوشاقلار محرم عمی اوخور دیه رک اویونی بوراخیب دام اوستونه قاچیب او سسه قولاق آساردیق. اوسس محرم عمینین اوزاخدان گلن سسی یدی. محرم عمی" پیره ناخیرچی" دا اوخویاندا حِس ائلردیک یانیمیزدا اوخور . اونون او قَدَر سَسی قُدرَتلی واثَرلیدی کی هر اِ شیدن
ایشین بوراخیب دقتیلن اونا قولاخ آسیردی . محرم عمی نین ماهنی لاری اوره کده کی درد سوزلریندن ایدی . اونون بایاتیلاری سوسیال ظلملر واجتماعی عدالتسیزلیک لردن خبر وریردی:
بو داغدا اکــدیم اکین
آلدیــــلار الیمده کین
هیچ کافر هیچ مسلمان
اولماسین منیــم تکین
دام اوستیندن قولاغ آسان قوجا قادین لارین گوزلریندن" حورا چشمه" سوئی تک آخار زینه زینه گوز یاشین گورن زامان منده باشلاردیم آغلاماقا . محرم عمی گنجلیگینده بیر قدرتلی وزورلی پهلوانیمیش . بیر طرفدن روزگاردان چکدیگی فشار اوبیری طرفدن ایچریدن گلن پهلوانلیق زورو باعث اولموشدو محرم عمینین گوزلری کور اولسون.
عزیزیم نئجه کــــــــچدی
بیلمه دیم نئـــــجه کـچدی
منیمکی آخ – واییـــنا ن
سنینکی نئـــــجه کـچدی ؟
محرم عمی ئوز آنا یوردون چوخ سئویردی .بو مسئله اونون بایاتیلاریندان بللنیردی:
عزیزیم وطن یاخچی،
کوینکی کتان یاخچی،
غوربت یئر جنت اولسا،
یئنه ده وطن یاخچی
عزیزیم دیلن گز،
باغدا گوله دیلن گز،
غوربتده خان اولونجا،
وطنینده دیلن گز
هر ایل یازین ایلک چاغیندا کندیمیزه یولوم دوشنده ، محرم عمینین نیسگیللی سس لری وسوزلری یادیما دوشنده گوزلریمدن گوز یاشیم اوزومه آخیر .کاش بیرده اوشاق اولوب او شان چاقلاری گوریدیم...........
بوستانام تاغیم آغلار
غمدن یاپراغیم آغلار
ساغام اوزوم آغلارام
اولسم توپراغیم آغلار